新派港式中菜廳 The Praya 最近聯乘老字號 麥文記麵家，打造名為「港式雲吞麵的新蘊演繹」的期間限定企劃。今次合作以五道創新菜式為主軸，結合攝影展覽，將地道港味以當代手法重新包裝，呈現一場由味覺延伸至視覺的多重體驗。喺藝術氛圍濃厚的三月，The Praya 用一碗雲吞麵講一個屬於香港的故事。
The Praya 一向主打將傳統中菜加入現代烹調元素，廚房團隊早前特別走訪麥文記，由淥面到包雲吞逐步學習，吸收老店多年來嘅精髓。劉祿餘師傅透露，最花時間嘅其實唔係創作新菜，而係研究點樣保留麥文記特色之餘，又能融合自己團隊嘅想法與手法。經反覆試煮後，終於誕生咗五款菜式，各有個性，又互相呼應。
第一道「炸雲吞水餃伴果香醬」，選用麥文記嘅全蝦雲吞同鮮蝦水餃，以高溫炸至金黃酥脆，配上自家調配嘅果香醬，酸甜之間帶出蝦嘅鮮味。另一道「魚湯雲吞」，由鄭胤龍師傅主理，以16公斤紅衫魚熬製五小時成魚湯，配搭全蝦雲吞，湯頭濃郁滑順，入口即見誠意。喜歡叉燒嘅話，不妨試試「黑毛豬叉燒撈粗麵」，用低溫慢煮16小時嘅黑毛豬叉燒，再炭燒增添焦香，配搭麥文記粗麵同九龍醬園嘅古法豉油，鹹香得宜，令人回味。
講到陣容最華麗嘅，就要數「薑蔥龍蝦銀絲兩面黃」，以西澳龍蝦球配上煎至外脆內嫩嘅銀絲麵，淋上The Praya 秘製龍蝦上湯，香濃飽滿。壓軸之作「砂窩雲吞雞」則以三黃雞熬湯七小時作基底，再加入全蝦雲吞，濃郁雞香與海鮮鮮味互相輝映，層次豐富。
今次合作不單止係一場美食交流，更是一趟文化傳承之旅。麥文記第二代掌舵人 Lesley Mak 表示，雲吞麵唔只係一道菜，而係一段香港歷史嘅縮影。佢希望透過是次企劃，令更多年輕人重新認識這道地道經典。為進一步延伸這個主題，The Praya 邀請資深攝影師謝浩然為五道新菜創作攝影作品，運用同色系佈景與極簡構圖，捕捉食材本身嘅質感與特徵，例如蝦身紋理、銀絲麵條張力等，同時拍下The Praya團隊與麥文記交流過程中真摯又專注的畫面。
攝影作品現正於The Praya店內展出，食客可以邊食邊睇，感受每一道菜背後的手藝與情懷。是次企劃靈感亦來自剛出版的《麪麪俱緣——麥文記的故事》，由李林風及林君宜合著，記錄麥文記70年來經歷香港社會變遷的故事，反映本地小店如何在城市中堅持初心，亦展現咗香港精神：傳承與創新，缺一不可。
The Praya x 麥文記 「港式雲吞麵的新蘊演繹」期間限定
時間：即日起至2025年3月31日
地址︰石塘咀干諾道西 181 號粵海 181 酒店 3 樓
電話︰3181 1666
網站︰thepraya.hk
訂座連結︰sevenrooms.com/reservations/thepraya
查詢電郵︰reservation@thepraya.hk