春天就係要食得fresh又靚，中環靚景餐廳WATERMARK最近推出全新四大餐飲亮點，由假日早午餐、母親節限定、全新單點菜單，到時令晚市套餐都一一上場，加埋270度維港景致同多款精緻食材，無論係朋友聚餐定家庭聚會都搵到啱心水。
假日限定「Weekend Harbour Brunch Bliss」早午餐 菜單
新登場嘅「Weekend Harbour Brunch Bliss 假日海畔早午餐」，逢星期六、日及公眾假期中午12點至3點供應，每位$598起，主打14款精選前菜任添，加上一款自選主菜與甜品拼盤，視覺味覺都照顧周到。前菜方面有「和牛他他」、「淺漬帶子」、「烤一夜干魷魚」、「炸粟米餅」等人氣之選，仲有「布拉塔芝士配布冧」同「紫菜牛油酸種麵包」等層次豐富嘅配搭。
主菜選擇亦夠晒吸引，包括人氣「三黃雞肉卷」、「烤三文魚」、「西班牙伊比利亞黑毛豬」，或加錢升級至「M7和牛後腰脊肉」（加$120）或「烤波士頓龍蝦」（加$220），每款都係誠意之作。甜品拼盤可無限添食，最啱打卡又滿足甜品控。加$290仲可享150分鐘氣泡酒、紅白酒、啤酒及雞尾酒任飲，或$60享無酒精飲品，小朋友亦有專屬兒童早午餐選擇。
母親節限定6道菜餐單＋家庭共享海鮮拼盤
為慶祝母親節，WATERMARK特別推出6道菜節日限定餐單，每位$498起（兩位起用），於中午至晚上9點期間供應，菜式設計細膩，啱晒一家人慢慢嘆。頭盤係招牌「海鮮拼盤」，有齊生蠔、大蝦、油甘魚、帶子、魷魚及鮑魚，更可加$200升級加配半隻龍蝦連三文魚籽，滿滿鮮味。
之後前菜如「炸意大利櫛瓜花」、「和牛他他」、「布拉塔芝士」等，口味層層遞進。主菜可選12安士乾式熟成肉眼扒或香煎盲鰽，配料豐富，香味撲鼻。餐尾送上柔滑「咖啡意大利芝士蛋糕」，甜而不膩。另設小童餐（$150），包含主菜、甜品及飲品一杯，照顧一家大細不同口味，喺靚景之中共度溫馨時光。
全新單點菜單主打時令食材＋多款精緻冷熱前菜
想更自由配搭？新一季單點菜單以時令海鮮、素食及肉類為主，款款都用料講究。必試推介包括「松葉蟹沙律」（$148），配上日本黄身酢同紫菜脆餅，清爽開胃；「北海道帶子」（$178）置於自家青蘋果莎莎醬上，酸甜中帶清香；「舞茸野菌忌廉湯」（$108）菌香濃郁，層次十足。
主菜方面，「深海白鱈魚」（$338）配風乾火腿泡沫、蘆筍、日本南瓜等，魚肉滑溜，味道有驚喜；「M7和牛後腰脊肉」（$398）油脂分布靚，配法式薯批同焦糖洋蔥，口感濃郁；而「烤八爪魚」、「鴨胸」、「蔬菜扁意粉」亦係不容錯過之選。甜品新推出「香蕉拖肥」（$78），將香蕉、朱古力、蜜餞胡桃完美結合，濃甜不膩，畫龍點睛。
晚市時令套餐升級7道菜版本＋純素餐單同步供應
晚市方面，WATERMARK新推「時令晚市嘗味菜單」，每日晚上6點至10點供應，設5道菜（$528）及7道菜（$698）版本，配搭更靈活。前菜有「淺漬油甘魚」、「布拉塔芝士」，加上七道菜專屬「北海道帶子」及「三黃雞肉卷」，再加上香濃「龍蝦湯」，一步步提升味蕾體驗。
主菜可選「深海白鱈魚」、「M7和牛後腰脊肉」，或加$198升級「烤原隻波士頓龍蝦」，鹹香惹味，絕對值得加配。甜品則有「芒果椰子蛋白脆餅」作結，輕盈帶果香。另設$328純素餐單，主打「椰菜花」、「炸櫛瓜花」、「耶路撒冷亞支竹」等時令蔬食，並以「新鮮水果配蜜桃雪葩」作結，為素食愛好者帶來專屬驚喜。
WATERMARK
地址︰香港中環7號天星碼頭平台L號舖
時間︰中午12時至晚上10時
電話︰（852）2167-7251
